Korea ram pahnih hruaitute inhmu dawn
North Korea ram hruaitu Kim Jong-un leh South Korea President Moon Jae-in te chuan vawiin hian meeting an nei dawn.
Meeting nei tur hian NKorea hotu Kim Jong-un chuan ramri kanin South Korea a pan dawn a, hei hi kum 1953-a Korean war a tawp hnuah NKorea ram hotu lu berin South lam a kal ṭum khatna tur a ni.
SKorea President Moon Jae-in chuan an ram huna zing dar 9.30 ah Kim hi ramri-ah hian a lo hmu dawn a ni. Hruaitu pahnihte inbiaknaah hian tunhnaia NKorea-in nculear ralthuam siam leh enchhin a titawp tur thu a sawite pawh an sawi zui dawn a ni.
Tun hnaiah Korea ram pahnihte inkar boruak hian ṭhat lam a pan chho a, hei vang hian hruaitu pahnihte
pawh hian inhmuh hi an remti a ni. NKorea hotu Kim hian May thla tawp emaw, June thla tir lam emaw hian US President Donald Trump chu meeting neihpui a tum bawk.
Moon hian ramri-ah Kim leh a zuitu official pakua-te chu lo hmuakin,
he hmun aṭang hian South Korea sipaite chuan an inbiakna tur hmun, demilitarised zone (DMZ)-a military compound,
Panmunjom-ah an hruai ang. Moon leh Kim hian Panmunjom-a Peace House-ah dar 10.30 aṭangin official meeting an nei ṭan dawn a ni. First session neih zawh hnuah chaw chhun eiin an chawl ang a, hemi hnu hian hruaitu pahnihte hian ram pahnih aṭanga lei leh tui an lakkhawm hmangin thing
ṭian an phun ang. Hei hi inremna leh hmungilna chhinchhiahna atan an ti a ni.
Thing ṭiak an phun zawh hnuah Panmunjom-ah inbiak thawh hnihna hi neih chhunzawm a ni dawn a, inremna thuthlungte ziakin thuchhuah inṭawm an siam nghal ang. South lam hian North hotu Kim leh palai dangte lawmna ruat an buatsaih sak dawn a, 'Spring of One' tih video an enho bawk ang. Hemi zawh hian NKorea ram aiawhte hi an ram lamah an kir ang.
Kim hi official pakua-in an ṭawiawm dawn a, an zingah hian a farnu Kim Yo-jong pawh a tel ang. Kim-i hian South Korea-a Winter Olympics neih ṭum khan North lam aiawhte chu a lo ho tawh a ni. North Korea nominal head of state, Kim Yong-nam pawhin vawiin hian Kim Jong-un hi a zui dawn a ni. Official zingah hian sipai hotu leh diplomats pawh an tel dawn a ni.
South lam hian inbiaknaa President Moon hnung zui tur hian official pasarih a tir dawn bawk a, an zingah defence, foreing affair and unification minister-te an tel ang.