Brazil SC-in Lula thubuaiah vote la dawn

Brazil-a Supreme Federal Court (STF) chuan an ram president hlui Luiz Inacio Lula da Silva chungchang chu May 4 hian ngaihtuahin vote a la dawn. Vote lak hian jail aṭanga Lula chhuah tir a nih theih dawn leh dawn loh a hril dawn tih court chuan a sawi.

Federal judge Sergio Moro chuan president hlui Lula hi thamna sum tam tham tak laa puhnaah thiam loh chantirin, kum 12 tang turin a lo hrem tawh a ni. Lula chuan court thutlukna hi ngaihtuah ṭha turin ngen mah se, court chuan a appeal-na ngaihtuah a nih chhung pawhin jail-a dah turin a ti a, hei vang hian April 7 khan man a ni. Jail aṭanga chhuah anih loh chuan kumin October thlaa Brazil president thlanna neih tura Lula-an chuh a tum pawh a nghawng thei dawna ni.

STF judge-te chuan Lula thubuai chungchang hi sawiho tura a hranpaa inhmuh kher loin, May 10 zanlai thleng an vote an theilut thei dawn a ni. Vote-te hi deadline hmaa a luhfe hman vek chuan, result pawh huntiam aia hmain puan a ni ang.

Lula-a party, Workers' Party (PT) chuan Lula an puhna hi politics lama inbeihna, an elpuiten inthlana chuh theh lo tura siam tuma an beihna niin an sawi a, Lula chu an party president candidate a la nih chhunzawm reng thu an tarlang bawk.