US-ah darkar 24 chhungin Covid-19 vangin mi 2,439 thi
US-ah Nilaini khan Covid-19 vanga thi mi 2,439 an awm a, hemi ni vek hian hri kai hmuh chhuah thar mi nuai hnih dawn an awm bawk.
US-a national holiday an ngaih pawimawh ber zinga mi, Thanksgiving Day hmang turin Nilaini khan ṭum dang aiin zin vei vak pawh an tam a ni. Sorkar chuan an rama hripui leng vangin kuminah chuan Thanksgiving holiday hmang tur pawhin zin chhuak lo turin mipuite a ngen a, mahse hei hian zawm a hlawh lutuk lo. Kum dang nena tehkhin chuan zin vei vak hi tlem deuh mah se, tun kar chhoah airport-te pawh a lun leh hle a ni.
Krismas-ah chhungkawpathum awmkhawm phal
UK chuan Covid-19 leng vanga khuahkhirhna a siamte chu Krismas pual bikin, ni nga chhung atan a thlahdul deuh dawn.
December 23-27 inkarah chhungkhaw pathum chin chu Krismas pual hian an inhmuhkhawm phalsak an ni dawn a, an chenna inah emaw, sakhaw hmun pawimawhah emaw, outdoor public place-ah emaw an inhmuhkhawm phalsak an ni ang.
UK chhung bikah Krismas pual hian chhungte an tlawh theihna turin zin khapna siam chu hlih a ni dawn a, mahse sorkar chuan public transport service belh a tum lo a, mipuite chu an zin leh haw dan tur a hma aṭanga lo ruahman lawk turin a ti.
Khawvel pumah hri kai6,07,94,981 awm tawh
Worldometers in a tarlan danin, nimin thleng khan khawvel pumah Covid-19 kai hmuh chhuah mi 6,07,94,981 an awm tawh. Heng zinga 4,20,91,238 chu enkawl dam ni tawhin, hripui thihpui hi mi 14,28,215 an awm tawh a ni.
US chu hri kai leh hripui thihpui tamna ber ram a la ni chhunzawm zel. US-a Covid-19 kai hmuh tawh hi 1,31,39,882 an tling tawh a, an zinga 2,68,262 in an thihpui tawh.
US dawtah India, Brazil, Russia, France, Spain, UK, Italy, Argentina leh Colombia-te chu hri kai tam zualna ram 10 zingah an tel.