Japan rorellai party hruaitu atan Fumio Kishida thlang

Japan rama rorellai, Liberal Democratic Party (LDP) hruaitu thar atan Fumio Kishida chu nimin khan thlan a ni a, prime minister thar a ni dawn ta a ni.

Prime miniter nilai leh LDP hruaitu, Yoshihide Suga chuan kum khat chauh PM dinhmun a chelh hnuah PM a nihna aṭanga a ban tur thu hi a puang a ni. Hei vang hian a thlaktu tur hi thlan a ni a, foreign minister hlui Kishida hian candidate lar zawk Tako Kono hnehin thlan tlin a ni ta a ni. Kar leh Thawhṭanniah Parliament-ah prime minister Suga thlaktu tur hi thlan a ni dawn a, LDP hian majority an neih avangin Kishida hi tling chiang tura ngaih sa a ni.

Hetih lai hian Tokyo Olympics an thlen chungchang leh hri leng dona kawnga sorkar hma lak dana sawisel an tawh nasat avangin LDP larna hi a tlahniam chak hle. Prime minister thar tur, Kishida tan pawh hmabak a hautak chho nghal dawn hle. Hri leng vanga an ram economy dinhmun tlahniam siamṭhat leh, North Korea lamin an vau rengte a hmachhawn nghal a ngai dawn a ni. Kumin November 28-a an ram inthlanpui neih turah pawh LDP hi a kaihhruai dawn bawk a ni.

Kum 64 mi, Fumio Kishida hi October 4-a Parliament special session neiha Japan prime minister 100-na ni turin lakluh a ni ang. Kishida hi politician chhungkua aṭanga seilian niin, moderate-liberal politician tia hriat a ni. LDP policy chief pawh a lo ni tawh ṭhin.

Emergency puan titawp dawn
Japan sorkar chuan Covid-19 hri leng vanga an rama state of emergency a puan chu hri lengin ziaawm lam a pan tak avangin tihtawp a ni tawh dawn tih a sawi.

Prime minister Yoshihide Suga chuan thla ruk chhung emergency puan tawh chu vawiin hian tihtawp a nih dawn tih sawiin, khuahkhirhna siamte pawh a tahtawlin hlih chhoh zel tum a ni, a ti. "Hri hi la awm mah se, nitin nunphung pangngai kan zawh theihna turin khuahkhirhna siamte pawh thlahdul chhoh zel a ni ang," a ti a, hemi rual hian Covid-19 treatment facility tam zawk siam belh a, vaccine semchhuah pawh chak zawka kalpui tum a nih thu a sawi bawk.

Hri leng vanghian kumin April thla khan emergency hi puan a ni a, mahse hri kai thar an awm chhoh zel avangin sorkar chuan a pawtsei chhunzawm ta zel a ni. Emergency puan ni mah se, ram dangte angin hri leng vanga khuahkhirhna khauh tak leh lockdown-te erawh an kalpui ve hran lo a ni.

Vaccination minister Taro Kono chuan vaccine dose hnih la tawhte tan booster dose pek tuma an inbuatsaih thu a sawi a, kuminah booster dose hi damdawi lama thawkte hnenah pek a, nakkum kumtir lamah kum upa zawkte pek hman an tum tih a sawi.