Germany : SPD-in party dangte inbiakna neihpui dawn

Germany ram inthlan­pui, Pathiannia neih zawh taka Chancellor Angela Merkel conservative party laka hnehna changtu, Social Democrats (SPD) chuan party mala sorkarna a siam theih loh avangin thawhpui turin Greens and Free Democrats-te chu inbiakna a neihpui dawn.

Greens leh Liberal FDP-te hi kawng hrang hrangah an ngaihdan a inang lo hle a, SPD emaw conservative emaw pawh inbiakna an neihpui hmain part pahnihte hian inbiakrawn hmasak phawt a, an thawhdun theih dan kawngte enchian phawt an tum tih an sawi.

Party mala sorkar siam thei an awm lo a, hei vang hian seat la hnem ber SPD hian party dangte nena sorkar siam dan kawng a dap phawt dawn a ni. SDP parliamentary party leader Rolf Muetzenich chuan party tê pahnihte nen a inhriatthiam lohna dah ṭha a, thawhho dan kawng ngaihtuah chu ṭha a tih thu a sawi a, mahse tunkar chhung ngeia inbiakna hi kalpui a duh thu a sawi bawk.

SDP Chancellor candidate, Olaf Scholz pawhin thawhhona ṭha tak an siam theih ngei a beisei tih a sawi. SDP kaihhruai sorkar thar hi siam a nih chuan, Scholz hi kum 2005 aṭanga Germany Chancellor atana Angela Merkel thlan a nih hnuah SDP Chancellor ni thei hmasa ber a ni ang.

Hetih lai hian conser­vative lam hruaitu, Amrin Laschet chuan CDU/CSU chuan inthlanpuia an chet chhiat ber ṭum tawk mah se, sorkar siam dan kawng an la ngaihtuah ve tho dawn tih a sawi. Mahse Greens party hruaitu chuan ṭangrual sorkar hi SDP leh FDP te nen an siam a rinawm zawk thu a sawi thung.

Infratest Dimap-in mipuite ngaihdan lak aṭangin Chancellor thar atan Scholz duhtu hi tam berin 62% an awm a, Laschet duhtu chu 16% chauh an ni thung. SPD,FDP leh Greens thawkho tura duh 55% an awm bawk.

Germany ram inthlanpui neih zawh takah hian party upa ber SPD chuan vote 25.7% an hmu a, kum 2017 inthlanpui aiin an vote hmuh zat hi 5% in a sang zawk. Merkel-i kaihhruai CDU/CSU conservative bloc chuan 24.1% an hmu a, Greens hian vote tla aṭanga 14.8% an lak laiin FDP chuan 11.5% an la thung a ni.