Pakistan-ah foreign terrorist organisation 12 an awm

US Congressional report on terrorism chuan Pakistan ramah 'foreign terrorist organisation' (FTO) 12 an awm tih a sawi.

Congressional Research Service (CRS) chuan Pakistan ram chu firfiak pawlten an hmunpui leh, hmun dang beihna atan an hmang fo tih sawiin, heng zinga pawl ṭhenkhat chu kum 1980 chhoa awm tawhte an ni, tiin a report-ah hian a tarlang. Heng firfiak pawl zinga panga chu India ngaimawhtu, India rama pawikhawihna thlen fotu nia sawi an ni bawk.

'Foreign terrorist organisation'-a puan zingah hian Lashkar-e-Taiba (LET) hi kum 1980 tawp lama din niin, kum 2008-a Mumbai, India beihnaa a mawhphurtu ber a ni. Kum 2000-a din, Jaish-e-Mohammed (JEM) chu kum 2001-a India Parliament leh hmun pawimawh dang beihnaah LET nen an inhnamhnawih bawk. Harakat-ul Jihad Islami (HUJI) hi Afghan Taliban-te hnenah fighter-te supply ṭhin a ni a, anni pawh hi India rama pawikhawihna thlengah a lo inhnamhnawih tawh ṭhin bawk. Hizb-ul Mujahideen (HM) pawh hi Jammu and Kashmir-a rawlrala che thin pawl lian ber zinga mi a ni.

Pakistan ram aṭanga chetla ṭhin firfiak pawl zingah hian al-Qaida pawh a tel tih CRS chuan a sawi bawk. Anni bakah hian Islamic State-Khorasan Province (ISKP / IS-K); Afghan Taliban, the Haqqani network, Tehrik-i-Taliban Pakistan (TTP), Balochistan Liberation Army (BLA), Jundallah (aka Jaysh al-Adl), Sipah-e-Sahaba Pakistan (SSP), leh Lashkar-e-Jhangvi (LEJ)-te an awm bawk.