Afghanistan-a sipai 2,500 dah rih turin Biden thurawn kan pe : US General
US sipai hotu pahnih chuan August thlaa Afghanistan aṭanga America sipaite lakchhuah vek an nih hma khan, US president Joe Biden hnenah sipaite chu lakchhuah kim nghal vek lo a, 2,500 vel awm chhunzawm tir rih tura thurawn an pek thu an sawi.
Genral Mark Milley leh General Frank McKenzia-te chuan he thu hi Congress hmaah an sawi a, mahse president Joe Biden erawh chuan hetianga thurawn an pek hi a hriat loh thu a sawi ve thung.
Gene Milley chuan Afghanistan-a Taliban-ten ram an lak chak dan leh, Afghanistan sorkar a tlachhe rang lutuk chu an rin phak bak niin, US leh ram dangte mak tih a tling a ni, a ti.
US Senate armed services committee chuan Thawhlehni khan general pahnihte leh defence secretary Lloyd Austin-te chu Afghanistan chungchangah hian thu an zawtfiah a ni.
US President Biden thupek angin, Taliban-ten Afghanistan-a thuneihna an lak hnuah August thla khan America sipai awmte chu lakchhuah kim an ni. Sipaite lakchhuah kim an nih hma lawk,August 26 khan Kabul airport bula bomb puakah mi 182 an thi a, an zingah hian US sipai 13 an tel.
Afghanistan aṭanga sipaite lakchhuah chungchang buaipuitu, US Central Command hotu Gen McKenzia chuan Republican senator-te zawhna a chhannaah, Afghanistan-ah chuan an sipai 2,500 dah chhunzawm rih a rawt tih a sawi. Gen Milley pawhin he a thurawn hi a pawmpui thu a lo sawi bawk a ni. Hetih lai hian August 19-a ABC journalist-in a kawmnaah, President Biden chuan sipaite dah chhunzawm tura thurawn pe an awm a hriat loh thu a lo sawi tawh thung. President Biden hian thu dik lo a sawi em ni tia an zawhna erawh chu general-te hian a sawizui duh lo a ni.
Senate armed services committee-in general-te thu an zawhfiah hnuah, White House thupuangtu Jen Psaki chuan hemi chungchang hi sawi zui ve lehin, "President chuan sipai hotute thurawn pekte chu a ngaihlu hle a, mahse hei vang hian an thurawn pek zawng zawng a pawm vek tihna erawh a ni lo," a ti. Afghanistan-ah chuan an sipaite chu la awm chhunzawm zel se chuan US leh Taliban chu an indo dawn a ni, tiin a sawi.