Myanmar sipaiten Sagaing huamchhungah airstrike nei

Myanmar-a rorellai, sipaite leh tualchhung mite inkara buaina chhuak vangin sipaite chuan Sagaing huamchhung khaw hrang hrang chu thlawhtheihna hmangin an bei leh.

Sipaite beihna avang hian khawchhung mi sang tel chu himna zawngin an tlanchhia a, an inbeihnaah hian sipai lam pawh ṭhahnem tak an thi nia sawi a ni bawk.

Radio Free Asia-in a report danin, sorkar sipaite leh helpawl, Kachin Independence Army (KLA) te chu Pinlebu khuaah an inbei a ni. Sipaite hian Pinlebu bakah he khua aṭanga khawchhak lam km 180 vela hlaa awm, Kathaa khaw mite pawh an awmna chhuahsan tur hian thu an pe niin Katha khaw mite chuan an sawi.

"Pinlebu khuaa chengte chu hmun danga insawn tur tih niin, insawn duh lote chu an chungah engpawh thleng se mawh an phur dawn lo tih sipaite chuan an sawi a, mi 3,000 vel an inhnamhnawih ang," tiin tualchhung mite chuan an sawi.

Sipaite hian airstrike an neih hnuah Pinlebu, Kawlin leh Wuntho khua internet leh telephone line-te chu an tihtawp sak nghal a ni.

Myanmar sipaite hian National League for Democracy (NLD) sorkar an paihthlak chungchangah thiam channa zawngin, kum 2020 November thlaa inthlan an neihah khan NLD hian ballot vote an an khawih chingpen niin an puh a ni. February 1 khan sipaite chuan NLD sorkar hi paihthlain, Senior General Ming Aung Hlaing kaihhruaiin sipaite chuan ro an rel zui a ni.

Myanmar mipuite chuan civil sorkar paihthlak a ni hi duh loin lungawi lohna an la lantir chhunzawm reng a, sipaite nen pawh hmun hrang hrangah intibuaiin buaina a la chhuak fo a ni. Ramchhung buaina thleng mek avangin mi maktduai thum chuang chu ṭanpui leh chhawmdawl ngaiin an awm mek tih UN Office for the Coordination of Humanitarian Affairs (OCHA) thuchhuah chuan a tarlang.