US Secretary of State atan Mike Pompeo lalut

US President Donald Trump-an Secretary of State atana a rawt, CIA Director Mike Pompeo chu Senate chuan pawmin, lakluh a ni ta.

Ningani khan Senator-te chuan Secretary of State thar atana ruat chungchangah hian vote lain, a thlawp lamah vote 57 a tla a, a duh lo lamah vote 42 a tla thung. Trump-a nominee, Pompeo hi army officer hlui, Republican congressman niin, Trump-a policy thlawptu nghet tak nia sawi a ni.

Pompeo hi Guantanamo Bay tan-in hawn chhunzawm duh tu, mi tangte nghaisak thlawp lam hawia thu sawi ṭhin niin, President Trump-an Secretary of State atana a rawt pawh hian sawizui a hlawh hle a ni. Mahni anpui kawp leh Islam chungchang na tak a sawisel tawh avangin Democrats lam chuan an ram aiawh chuan a tawrawt mah mah a, khawvel hmaa US aiawh turin a tling tawk lo niin an ngai. Senate Foreign Relations Committee-a member 21 zinga Democrats member 10 chuan Pompeo-a nomination hi an thlawp lo a ni.

Senate-in Secretary of State atana a rawt a pawmsak avangin President Trump chuan a lawm thu a sawi nghal. Thuchhuah siamin, US Secretary of State 70-na, Mike Pompeo chu talent, thahrui leh thiamna ropui tak nei a ni tih sawiin, hengte hi an ram tana rohlu leh, hun khirh tak an tawh hunah pawh thil ṭangkai tak tur a nih thu a sawi. Pompeo chuan America mipuite ṭhatna tur chu a dah pawimawh hmasa ber zel dawn a ni tiin, a thlawp zel tur thu Trump chuan a sawi.

Donald Trump leh North Korea ram hotu Kim Jong-un ten meeting an neih tur chungchangah tun thla tir lam khan Pompeo hian a rukin Kim hi a lo hmu tawh a, inbiakna ṭha tak a lo neihpui tawh tih April 18 khan Trump chuan a sawichhuak a ni. Kim-Trump meeting hi May thla tawp lam emaw, June thla tir lamah emaw neih tum a ni. State Department chuan Pompeo hian Brussels-a NATO meeting-naah telin, hemi hnu hian Saudi Arabia, Jordan leh Israel-te a tlawh nghal dawn tih a sawi. Saudi King Salman, Israel Prime Minister Benjamin Netanyahu leh Jordan King Abdullah-te a kawm dawn a ni.