Pak HC-in foreign minister Asif a ban

Pakistan-a Islamabad High Court (IHC) chuan Ningani khan an ram foreign minister Khawaja Mohammad Asif chuan UAE foreign worker permit a neih a zep avangin minister a nihna aṭangin a ban a, a damchhunga politics khel thei tawh lo turin a hrem nghal bawk.

Court chuan Pakistan Constitution Article 62 (1) (f)-in, public office holder-te chu rinawm leh dik taka thil ti tura a phutna behchhanin, minister hi a ban a ni. Prime Minister hlui Nawaz Sharif-a pawh nikum July thla khan Panama Paper leak kaihhnawihah PM a nihna aṭangin ban a ni tawh bawk. Tun thla tir lam khan Pakistan Supreme Court chuan court-in mi rinawm leh dik lo nia a puan tawh chu a damchhunga politics khelh leh, public office a hna chelh a khapsakna tur thupek a lo siam tawh a ni.

Justice Athar Minallah kaihhruai member pathum awmna IHC bench chuan Asif hi kum 2013 inthlanah chuh tur khan a qualify lo niin a sawi. Court chuan Asif hian a duh thu rengin UAE-a company-a thawktu anga a awm leh, amah awm lo chunga thla tina hlawh UAE Dirham 50,000 a lak ṭhin chu a tarlang lo a ni, a ti. HC chuan Asif hian National Bank of Abu Dhabi-a bank account a neih pawh a nomination paper-ah hian a tarlang lo tih a sawi bawk.

Asif chuan High Court thutlukna siam hi Supreme Court-ah a khing let dawn tih a sawi a, foreign permit a neih hi a zep ngai lo niin a sawi.