NKorea-in May thlaah nuclear test site khar dawn

South Korea president office chuan North Korea chuan a nuclear enchhinna hmun chu May thla aṭang hian a khar tawh dawn tih a sawi.

NKorea-in Punggye-ri site a khar tur hi mipui hriata tih a ni dawn a, he hunah hian South Korea leh US-a expert-te bakah reporter-te pawh sawm an ni dawn tih SKorea president thupuangtu Yoon Young-chan chuan a sawi. Hetihlai hian scientist-te chuan nikum September thlaa NKorea-in nuclear a enchhin ṭum khan lei nghawr nasa takin a hmun ṭhenkhat hi a tichhia a, hman zui tlak a ni lo niin an sawi thung.

Kar kalta Zirtawpni kahn North Korea hruaitu Kim Jong-un leh South Korea President Moon Jae-in te chu inbiain, Korean peninsula-a boruak ralmuang zawk a awm a, nuclear ralthuam tihbo an rel a ni. Hemi hnu hian US President Donald Trump pawhin peninsula aṭanga nuclear ralthuam tihbo chungchangah NKorea hruaitu nen hian kar thum/kar li hnu vela an inkawm tur thu a sawi nghal bawk.

Korea ram pahnih hruaitute hian inbiakna hlawhtling tak an nei a, NKorea official news agency, KCNA chuan inbiakna an neih hi fakin, ram pahnih hruaituten nuclear ralthuam tihtawp an remti chu thil chhinchhiah tlak tak a nih thu a puang. North Korea lam hian South lam nena an hun inmil turin a time zone pawh thlak a tum niin SKorea lam chuan a tarlang bawk a ni.