UNSC team-in Rohingya raltlan awmna tlawh

United Nations Security Council team chuan kar kalta Zirtawpni khan Bangladesh-a Rohingya raltlante awmna hmun an tlawh. UN official chuan raltlante chhawmdawlna tur leh an awmna biala tualchhung mite puihna tur hian US dollar maktaduai 951 mamawh a nih thu a sawi.

UNSC team hian Bangaldesh khawpui Dhaka bakah, chhim lama Cox Bazar area-a refugee camp an tlawh a, vawiin hian Myanmar lam a pan leh ang. UN thupuangtu Stephane Dujarric chuan Myanmar aṭanga Bangladesh-a tlanchhia, Rohingya awm zat hi maktaduai khat chuang an tling niin a sawi. An zinga 670,00 chu nikum August 25-a Rohingya helhoin security post an beih hnua Myanmar sipaiten Rohingya laka beihpui an thlak hnuah lut an ni. Raltlan hi an la luh belh reng a, kumin chhungin mi 8,000 vel an lut thar niin UN chuan a tarlang.

Stephane Dujarric Bangladesh sorkar leh mipuite chuan Rohingya raltlante chu ṭha taka an lo dawnsawn thu awiin, ram dangte pawhin an theih angin an pui a ni, a ti. Raltlante awmna hmunah hian tube well 5,000 leh inthiarna 47,000 siam a ni a, naupang 90,000 vel pawh lehkha zirtir an ni bawk niin a sawi. Chhungkaw 65,000 chuang chuan fur hunah pawh an awmna a him theihna tur hmanrua te an dawng tawh a, hetihali hian mi 15,000 vel awmna chu an awmna a him tawk loh avangin hmun him zawkah siam a ni dawn tih a sawi a, kawng siam hna pawh thawh mek zel a ni, a ti.