Israel ramri-a buaina chhuakah Palestinian mi pathum thi

Israel leh Gaza Strip inri-naah kar kalta Zirtawpni khan Palestinian mite leh Israel security force-te inkarah buaina a chhuak leh a, Israel sipaite chuan Palestinian nawrh huaihawt zinga mi pathum an kaphlum.

Gaza health ministry chuan Israel sipaite tear gas leh silai kah avanign mi 300 chuangin hliam an tuar niin an sawi. Hetih lai hian Israel sipaite chuan ramri-ah hian Palestinian mi 10,000 vel chuan nawrh huaihawtin buaina an siam a, hei vang hian sipaite chuan mipuite thunun nan silai an hmetpuak niin an sawi.

Palestinian mite hian kar nga chhung chu Gaza ramri-ah hian nawrh an huaihawt tawh a ni. Nawrh huaihawtte hian refugee-te chu an ram dik tak nia an chhal, Israel ram chhunga an kir phalsak turin an phut a ni.

Israel chuan Gaza-a roreltu, Hamas firfiak pawlte chuan nawrh huaihawt hi Israel beihna remchangah a hmang niin a puh. UN-a Israel palai, Danny Dannon chuan UN Security Council hnenah pawh Palestinian mite tawrhna thleng chungchangah Hamas chu mawphurtu a nih thu a sawi. Mahse Hamas chuan Israel puhna hi a pha thung.