Jerusalem-a US embassy hawn hunah Trump zin maithei

US President Donald Trump chuan Jerusalem-a US embassy hawn a nih dawn hunah a zin ve maithei tih a sawi.

President Trump hian Israel khawpuiah Jerusalem a pawm thu leh, US embassy pawh Tel Aviv aṭanga Jerusalem-a sawn a nih tur thu a lo puang tawh a ni. Hei hi ram hrang hrang, a bikin Arab ramte chuan an sawisel nasa hle a, Palestinian mite chuan duh lohna lantirin ṭum eng emaw zat nawrh an lo huaihawt tawh bawk.

US tlawha zin, German Chancellor Angela Merkel-i nena joint news conference an neihnaah Trump chuan hemi chungchang hi a sawichhuak a, “Jerusalem-a US embassy sawn chungchang hi president hrang hrangte chuan hun rei tak an lo tiam tawh a ni. Campaign-naah an auhlaah te an hmang a, mahse a taka kalpui ngam erawh an awm ngai lo. Kei chuan a takin ka hlenchhuak dawn a ni”, tiin a sawi.