Ecuador tan-ina buaina chhuakah thi mi 100 chuang tawh

Ecuador rama tan-in chhunga misual pawl, gang pahnih inkara buaina chhuak vanga thi chu mi 100 an chuang tawh tih official-te chuan an sawi.

Tan-in thuneitu chuan an ram khawpui Quito chhimthlang lam, Guqayaquil-a Thawhlehnia tani-in chhunga buaina chhuaka thi chu mi 100 chuang ni tawhin, hliam tuar mi 52 an bawk tih Nilaini zan khan an sawi. Buaina a chhuah aṭanga darkar nga hnu velah police leh sipaite chuan tan-in chhung hi an thunun leh thei tih sawiin, ralthuam pawh eng emaw zat an man tel.

Colombia leh Peru inkara awm, khawvela cocaine siamchhuak nasa ber zinga mi, Ecuador hi United States leh Europe rama ruihhlo tawlh ṭhinte inpekchhawnna hmun berah an hmang ṭhin. Kumin Janaury leh August inkar khan Ecuador thuneitute chuan ruihhlo tonne 116 vel an man a, heng zinga a tam ber chu cocaine a ni. Kum 2020 chhung khan ruihhlo hi ton 128 an man a ni.

Ecuador tan-in hi Mexican drug gang- Sinaloa leh Jalisco New Generation pawlte inbeihna atan an lo hmang fo tawh. Kuminah tan-in chhunga intihbuaina thleng vangin mi 120 chuang an thi tawh a ni. Tun ṭuma buaina chhuak hi 'Los Lobos' leh 'Los Choneros' gang-te inkarah niin an inbeihnaah hian silai, chem leh puakthei thil dangte pawh an hmang nia sawi a ni. Television-a tihlanah pawh tangte hian tan in chhunga silai an kap leh, puakthei thil dang an tipuak laite pawh a lang a ni.

Tan-in chhunga intihbuaina thleng fo avangin president Gullermo Lasso chuan July thla khan Ecuador prison system-ah state of emergency a lo puang tawh a ni. February thla khan tan-in pathuma buaina thleng vangin mi 79 an thi a, July thlaah buaina chhuak vang bawkin tang 27 in nunna an chan bawk.

Ecuador hian tan-in 65 nei mekin, heng hmunah hian mi 30,000 awm thei tura ruahman a ni. Mahse tunah hian tan-in hrang hranga tang mek hi mi 39,000 vel an tling.