NKorea hotuin inter-Korean hotline tihnun leh duh

North Korea ram hruaitu Kim Jong-un chuan Korea ram pahnihte inbiak tawnna, inter-Korean hotline an tihtawp chu October thla hian tihnun leh a duh thu a sawi.

August thlaa South Korea leh US sipaiten joint military drill an neih vanga lungawi loin, NKorea hian inter-Korean hotline hi a titawp a ni. Mahse Korea ram pahnihten ramriah boruak ṭha leh muanawm an nei theihna atan hotline hi tihnun leh a duh thu Kim chuan a sawi a ni. Hemi rual hian US chu NKorea laka a policy ngeiawm tak thlak danglam chuang loa inbiakna neih chhunzawm rawtah a puh bawk.

NKorea rubber-stamp parliament, Supreme People's Assembly (SPA) in an ram dinhmunte ngaihtuaha annual session an neih mekah Kim hian he thu hi a sawi a ni. "South Korea tihthinrim emaw, tihnat emaw tumna ka nei lo," tiin hetiang ngaihdan an lo neih ṭhinna chu SKorea chuan an tihbo a ṭul tih a sawi bawk a ni. Ram pahnihte inbiak tawnna chu tihnun leh a duh thu a sawi rualin, South Korea thuneitute awm danah a innghat tih a sawi.

Kim-a farnu, Kim Yo-jong pawhin kar liam ta khan SKorea-in an ram laka policy ṭha lo tak tak a neihte chu a titawp chuan, North lam chuan ram pahnihte inkar boruak ṭha siam tura inbiakna neih chu a duh thu a lo sawi tawh bawk.