A Ṭum khatna atan UNGA nei dawn lo

Kumin September thlaa New York-a United Nations General Assembly neih tur chu Covid-19 vangin neih theih a ni dawn lo a, kum 75 chhunga he assembly-a ram hrang hrang hruaitute inhmukhawm thei loa an awm ṭum khatna tur a ni.

Ruahman lawk dan chuan September 15-ah UN General Assembly session vawi 75-na hi UN headquaters New York-ah neih tum a ni a, high-level General Debate hi September 22-a neih tum a ni bawk. Mahse UN president Tijjani Muhammad-Bande chuan Covid-19  leng vanga kalkhawm a rem loh thu leh, ram hruaitute hi anmahni chauha ram danga zin a theih loh thu nimin khan press mite hmaah a sawi.

Muhammad-Bande chuan September 22-a neih tum, high-level General Debate erawh ruahman lawk anga kalpui tum a nih thu a sawi a, hei pawh hi boruak awm dan azirin kar hnih hnu lamah chuan tihdanglam theih a nih thu a sawi bawk. Thla hlui khan UN Secretary General Antonio Guterres chuan UN President hnenah hian kumina UNGA neih tum hi kum danga an neih loh dan ang deuha huaihawt turin thurawn a lo pe tawh. 

Guterres hian ram hruaitute emaw minister-te emaw chu pre-recorded message hmang turin a duh thu UN President hi a hrilh a, General Assembly Hall-ah hian ram pakhat aiawhin palai pakhat chauh tel phal turin thurawn a pe bawk. A hmain Guterres hian UNGA session neih hi ṭhulh chi a nih loh thu leh UN-in kum 75 a tlinna tur a nih thu a sawi a, hri leng hian ziaawm lam pan lo mah se video kaltlanga neih tum hram a ngaih thu a lo sawi tawh a ni. 

UNGA hi United Nations prin­cipal organ paruk zinga pakhat a ni a, UNGA-ah hian UN budget ngaihtuah a ni ṭhin a, Security Coun­­cil-a non-permanent member turte ruatin, UN Secretary-General thlanna neih a ni ṭhin bawk. Heng bakah hian principal organ dang 

aṭanga report-te session-ah hian thlen a ni ṭhin a, he session hian resolution hmangin rawtna an siam leh ṭhin.