North Korea-in anti-aircraft missile enchhin leh

North Korea chuan September thla chhhunga an ralthuam enchhin palina ni turin Ningani khan anti-aircraft missile an enchhin leh niin an sawi.

North Korea hian nuclear ang chiaha hnathawk theia an sawi hypersonic missile an enchhin hnu lawkah missile thar hi an enchhin leh a ni. Heng ralthuam a enchhinte hi US leh South Korea ramte dan dik lo taka an chetna karah an invenhim nan a ṭul niin a sawi a ni.

Khuahkhirhna hrang hrang siam sak ni mah se, Nkorea chuan ralthuam siam leh thawmṭhat hna chu chawl lova kalpui chhunzawm zel tih tun hnaia test a neih hrang hrang aṭang hian a hriat a ni.

March thla khan an ram laka hrekna siam chu ngai pawimawh loin ballistic missile a enchhin a, hei hi US, Japan leh South Korea te chuan an sawisel nasa hle a ni. UN atomic agency pawhin North Korea chuan nuclear weapon tana plutonium siamchhuak thei reactor an buaipui leh ṭan tawh tih a lo sawi tawh bawk.

State news agency, KCNA tarlan danin, anti-aircraft missile thar hi ral beihna hmanrua chungchuang tak, tunlai thiamna hmanga thuam a ni.

North Korea hotu Kim Jong-un-a'n South Korea nen inremna neih a duh thu leh, ram pahnihte inbiakpawhna pawimawh, hotline tihnun leh a duh thu a sawi tuk lawkah ralthuam hi an enchhin leh a ni.

North Korea hian kum khat chuang chu midang tlawhpawh thei lohin an inkharhip tawh a, hripui leng vangin China nena an insumdawn tawnna te pawh titawp lailawkin, ei tur lamah indaih lohna an tawh chhoh mek avangin an ram economy pawh a derthawng tawh hle.

US, Britain leh France chuan NKorea chungchang ngaihtuah turin nimin khan UN Security Council meeting an ko. He meeting hi Ningania neih turin a ti a, mahse Russia leh China chuan NKorea thiltih chu zirchian phawt an duh tih sawiin an tikhawtlai a ni.