Ethiopia sorkarin UN official 7 a hnawtchhuak
Ethiopia sorkar chuan an rama United Nations official pasarihte chu ramchhung inrelbawlnaa inrawlhah puhin, Ningani khan darkar 72 chhunga an ram chhuahsan turin a hriattir.
Ministry of foreign affairs-in an ram chhuahsan tura a tihte zinga Ethiopia rama UN Office for the Coordination of Humanitarian Affairs (UNOCHA) leh UN Children's Fund (Unicef) hotute pawh an tel a, ramchhung inrelbawlnaa inrawlha an puh dan chungchang erawh sawichian a ni lo.
UN secretary-general Antonio Guterres chuan Ethiopia sorkar thiltih dan chuan a ṭhawng hle tih sawiin, UN-in Ethiopia rama chhawmdawl hna a thawh hrang hrangte chhunzawm zel a nih theihna turin sorkar pawh hi inbiakna an neihpui nghal a ni.
US pawhin Ethiopia sorkar thutlukna siam chu a dem thu a sawi a, US Secrtary of State Antony Blinken chuan UN chu ṭam hmachhawn mai thei tur, mipuite ṭanpui leh chhawmdawl hna thawktu pawimawh tak a ni a, hei vang hian Ethiopia sorkar pawh a thultukna siam sut leh nghal tura a duh thu a sawi. White House press secretary Jen Psaki chuan chhawmdawl hna thawhna daltute lakah US chuan hrekna siam a hreh dawn lo tih a sawi nghal bawk.