Britain home secretary a bang

Britain Home Secretary Amber Rudd-i chu immigration quota chungchanga beih a tawh hnuin Pathianni zan khan a bang.

Prime Minister Theresa May-i chuan Home Secretary banna hi a pawmsak nghal a ni.

Kum 2016-a EU referendum avanga prime minister David Cameron a ban hnua PM atana May lakluh a nih khan Rudd-i hi chanvo pawimawh tak chelh tur hian ruat nghal a ni. Rudd-i hi May-i thachhang dawltu chak tak nia sawi a nih avangin a ban hian nghawng pawh a neih hle rin a ni.

Kum 1960 chhoa Caribbean region aṭanga Britain-a lut mi sang tel chu an ram lamah thawn haw tum nia sawi a nih avangin Rudd hian beih pawh a tawk nasa hle. Heng zinga mi ṭhenkhat hi kum 1970 chho khan British citizenship pek an ni. Mahse UK-a Caribbean pem lut, 'Windrush generation' tia sawite thawn haw tum chungchangah hian eptu lam, Labour Party chuan Rudd-i hi an bei nasa hle a, immigration policy siamah a mawhphurtu nia sawiin bang turin an lo nawr fo tawh a ni.

The Guardian chanchinbu chuan Caribbean aṭanga UK-a pemlut, hun rei tak awm tawhte chu Britain-ah medical care pawh pek an ni lo a, UK-a awm tura an dikna chanvo lantirna tur lehkhate an neih loh avangin an ram lama thawn kirah te vau an ni tih a sawi a ni. Rudd-i kaihhruai UK Home Office-in pemlutte thawn kir a tum chungchang lanna memo hi a putru a, hei hi Rudd-i hian a hriatpui vek nia sawiin Parliament Home Affairs Select Committee hmaa insawifiah tura koh a lo ni tawh bawk.

May-i hnena banna lehkha a thehluhah, Rudd-i chuan kar hmasa Nilaini-a parliamentary committee hmaah thu a sawiah, sorkarin dan loa pemlutte thawn kir a tum chungchang chu phain, committee chu thu dik lo a hrilh niin a ziaklang a ni.

Rudd leh May-i te chuan Windrush generation-te lakah hian ngaihdam an lo dil tawh a, kum 1973 hmalama Commonwealth ram aṭanga UK-a lut tawh, British citizenship la nei lote chu pek vek an ni dawn tih an sawi. Sorkar chuan vau leh he thil avanga harsatna tawkte pawh zángnadawmna pek a tiam a ni.