Pakistan-in Mumbai beihna chhuitu chief prosecutor a ban

Pakistan interior ministry chuan kum 2008, November 26-a Pakistan firfiakten Mumbai khawpui an beih chungchang chhuina thubuaia chief prosecutor, Chaudhry Azhar chu sorkar duhdan anga kal lo nia sawiin Pathianni khan a ban.

Kum 2008 khan Lashkar-e-Taiba (LeT) firfiak 10 chuan Karachi aṭanga Mumbai lutin, khawpui chhung hmun hrang hrangah pawikhawihna an thlen a, mi 166 thiin midang 300 chuangin hliam an tuar a ni.

Federal Investigation Agency (FIA) chuan Pathianni khan thuchhuah siamin, Interior ministry chuan kum 2009 aṭanga Mumbai beihna thubuaia chief prosecutor atana dah Chaudhry Azhar chu a ban thu a sawi a, mahse Benazir Bhutto-i thahna thubuai leh thubuai dangte chu a la buaipui chhunzawm zel dawn a ni.

Official chuan Mumbai beihna thubuai a kalpui danah Azhar hian sorkar lam nen ngaihdan inmil lohna an nei niin a sawi a, sorkar lam thu a ngaihchan loh avangin ban a ni ta niin a sawi. Mumbai beihna thubuai hi kum 10 zet buaipui ni tawh mah se, tun thengin Pakistan-a pawikhawihna inhnamhnawiha rinhlelhte chu hrem an la ni lo.