France President-in inbiaknaa tel turin Iran President a nawr

France President Emmanuel Macron chuan Iran President Hassan Rouhani chu telephone-a biain, Iran nuclear deal siamna tura inbiaknaa tel turin a nawr.

Iran leh ram thiltithei, world power ram paruk US, UK, Russia, France, China, leh Germany te chuan kum 2015 khan Iran nuclear programme tihtawp chungchanga inremna an lo ziak tawh a, he inremna hi May thla hian a tawp dawn a ni. US President Donald Trump chuan he inremna siam hi a ṭha tawk loin a huam zau tawk lo tih a sawi a, pawhsei a duh lo tih a lo sawi tawh a ni.

Inremna ziaktu zinga France, UK leh Germany chuan Iran nena nuclear deal an siam hi Iran-in nuclear ralthuam a siam zel tur danna atan chuan a ṭha tawk nia an ngaih thu an sawi a, hemi rual hian US President Trump-an a sawiselna ṭhenkhat chu ngaihtuah ṭhat a ngai niin an sawi.

Trump hian 2015-a inremna an lo ziah tawh aṭanga a inhnuhdawh dawn leh dawn loh a tichiang thuai dawn nia sawi a ni. Iran chuan he inremna aṭanga US a inhnuhdawh chuan inremna pawh hi a hmang zui dawn bik loh thu a sawi bawk.