Thailand-ah kawng zawh

Thailand hmarlam, Chiang Mai khawpuiah environmentalist-te chuan forest land-a in sak duh lohna lantirnan kawng an zawh.

Sorkar chuan forest area, Doi Suthep tlang bulṭhutah judge leh official-te awmna tur housing project a siam a, hei hi mipuiten an duh lo a ni. Pathianni khan Chiang Mai khawpuiah duh lohna lantirin kawng an zawh a, ribbon hring an bun a, thuneitute chu Doi Suthep tlanga in sakte ṭhiat nghal turin an phut. He forest area-ah hian temple lar tak a awm a, mi tam tak chuan hmun thianghlimah an ngai a ni.

Chiang Mai Police deputy commander Colonel Paisan chuan nawrh huaihawtte hian politics lam ni loin, leilung humhalh lam zawk an thupui ber niin a sawi a, kawngzawh an zawh hnuah pawh kawngpuite an phiatfai zui nghal niin a sawi. Nawrh huaihawtte chuan an thl phut tihlawhtling turin sorkar chu ni sarih hun an pe a, hemi chhunga hma a lak loh chuan nasa zawka nawr leh an tum tih an sawi.

Hetih lai hian thuneitute chuan in hi sorkar ramah dan ang taka sak niin an sawi thung a, national park huam chin engmah an khawih tel lo tih an sawi. He project atan hian an ram pawisa baht tluklehdingawn khat ( Dollar maktaduai 32) vel zet an seng tawh a, hna pawh an thawk zo hnai tawh niin an sawi a ni.