Philippine President Duterte-a'n Politics a chawlhsan dawn

Philippine president Rodrigo Duterte chuan a President term a zawh hunah politics a chawlhsan tawh dawn a, nakkuma inthlanpui neih turah pawh vice president post chuh a tum tawh dawn lo tih a sawi.

Kum 76 mi, Duterte hian thla hmasa lawk hian nakkuma inthlanpui neiha vice president a chuh tur thu hi a lo puang tawh a, mahse sawiselna a tam hnuah Inrinni khan vice president dinhmun chuh leh chu an ram danpui kalh a ni dawn tih sawiin, inthlan chuh loa politics chawlhsan a tum thu hi hi Inrinni liam ta khan a puang ta zawk a ni.

Philippine ram danpui hnuaiah kum ruk term President hi term khat zel chauh chelh theih a ni a, Duterte pawh hian inthlanah chuh leh a duh a nih pawhin President ni loin vice-president ah a chuh a ngai dawn a ni.

Kum 2016-a Philippine President dinhmun a chelh aṭang khan Duterte hian ruihlo do beihpui a thlak nghal a, a kaihhruaina hnuaia hma lak dan hian sawisel pawh a hlawh hle. Beihpui an thlaknaah mi 6,000 dawn thah an ni a, hei hi International Criminal Court pawhin a chhui chiang mek bawk.

Duterte-a'n politics chawlhsan a tum thu a puan tak avangin inthlanpuiah hian a fanu, Sara Duterte-Carpio chu ding tura rinna a lian nghal hle. A pa thlaka Davoa mayor ni mek, Duterte-Carpio hian inthlanah hian an pafa hnih chuan chuh dun loh an remtih thu a lo sawi tawh a, mahse pa a din dawn tak loh avangin a chuh rin a ni a, mipuite ngaihdan lak hrang hrangah pawh President-a duhtu hi an tam ber zel a ni.