Khawvel pumah Covid-19 vanga thi mtd 5 chuang awm tawh

Khawvel pumah kar liam ta Zirtawpni thleng khan Covid-19 vanga thi maktaduai nga chuang an awm tawh a, hetih lai vaccine la lo zinga Delta variant chu a darh leh nasa hle.

Covid vanga thi ni sarih chhunga thi zinga a zahve aia tam chu US, Russia, Brazil, Mexico leh India rama mite an ni.

Hri len tirh aṭanga kum khat velah Covid-19 vang hian mi maktduai 2.5 an thi a, hemi hnuah hian thla riat chhungin midang maktaduai 2.5 vel an thi leh hman niin Reuters-in a zirchiannaah a tarlang.

Kar hmasa khan khawvel huapah chawhrualin Covid vang hian nitin mi 8,000 emaw minute khatah mi panga zel thi ang emaw an ni. Thi zat hi tun hnaiah a hma ai chuan a tlahniam zel tawh thung.

Ram rethei tan vaccine tam zawk pek tumin hma lak zel a ni a, ram hausa zawkten vaccine dose hnihna bakah booster dose an pek ṭan laiin, ram rethei zawkah Covid vaccine dose khatna la lo an la tam hle.

Our World in Data-in a tarlan danin, Covid-19 vaccine dose khatna la lo hi khawvel pum mihring zahve aia tam a la tling.

World Health Organization (WHO) chuan vaccine pek chhuah tlemna ramah chauh COVAX distribution programme chu a kalpui tawh dawntih a sawi. WHO kaihhruainain COVAX hian January thla aṭang khan ram 140 hnenah an ram mipui tam dan azirin vaccine hi a pe chhuak a ni. Mahse an kalhmang an thlak tawh dawn tih sawiin, supply dawng ṭha lo ramah chauh an semchhuak tawh dawn tih WHO Assistant Director General for Access to Vaccines Mariangela Simao chuan a sawi.

Khawvela hri kai tamna leh thihpui tam berna, US-ah chuan kar liam ta Zirtawpni khan hripui vanga thi hi nuai sarih an tling. US-ah hian hri kai thar leh damdawi-ina dah ngai tlahniam deuh mah se, thlasik lo thleng turah inchhung lama chetna, indoor activities a tam chhoh dawn avangin health official-te chuan hri a darh leh a hlauhthawnawm thu an sawi a ni.

Covid-19 vangi thi tamna ber chu South America region niin, khawvel puma hri vanga thi zinga 21% an awm. A dawtah North America leh Eastern Europe-te niin, thi zinga 14% vel ve ve an awm bawk.