Nuclear ralthuam chungchanga dawt sawiah Iran puh

Israel Prime Minister Benjamin Netanyahu chuan Iran chuan nuclear ralthuam siamna tur programme a rukin ala kalpui reng niin a sawi a, a thusawi finfiahna document-te pawh a tilang a ni.

Israel PM thusawi hian kum 2015-a world power ram paruk leh Iran-in Iran nuclear program tihtawpna tura inremna an lo siam tawh, US-in pawhsei zel a duh loh thu a sawiah pawh nghawng a neih thui hle rin a ni. US President Donald Trump chuan he inremna lo siam tawh hi a ṭha tawk lo nia sawiin, pawhsei pawh a duh lo maithei niin a sawi tawh a ni. Netanyahu-an hetianga a sawi leh tak avang hian he inremna siam aṭang hian US hi a inhnuhdawh duh mai rin a ni.

Iran leh world power paruk–Britain, China, France, Germany, Russia leh US chuan kum 2015 khan Iran nuclear program khuahkhirhna turin inremna an siam a, he inremna siam vang hian US leh ram dangten Iran an hrekna chu hlih a ni bawk. He inremna hi May 12 hian a tawp dawn a, hetihlai hian President Trump chuan inrenma siam hi aṭha tawk loin a huam zau tawk lo tih a sawi a, pawhsei pawh a duh lo maithei tih a sawi.

World power leh Iran-ten nuclear deal an siam ṭhiah leh titawp tura vawi tam tak lo phuttu, Israel PM Netanyahu chuan Thawhṭanni khan Tel Aviv-a TV-a live presentation a neihah Iran-in a ruka nuclear programme a kalpui reng thu sawiin, an document-te pawh a tarlang a ni. Iran ram hruaitute chu an nuclear programme chungchangah vawi tam tak dawt sawiah a puh bawk.

Netanyahu chuan 2015 Iran nuclear deal hian Iran-in nuclear ralthuam a siam chu a tihtawp phah lo a tih a sawi a, he inremna siam vanga Iran ram hrekna hlih a nih bawk avangin Iran chuan Middle East-a firfiakte sum hmangin a pui thei bawk niin a sawi.

Netanyahu chuan Iran nuclear programme chauh ni lo, a missile programme pawh khuahkhirh sak tura a duh thu a sawi. Netanyahu-an document a tarlan hi phek 55,000 zeta chhah leh CD 183 zet a ni. Iran nuclear project , 'Amad' tih chu kum 2003 aṭang khan a ruka kalpui niin, tun thlengin an la thawh chhunzawm reng a ni, a ti. Kum 2015-a nuclear deal an ziah hnuah Iran chuan a file-te thukru tur hian theihtawp a chhuah niin a sawi bawk.

Hetih lai hian Iran Foreign Minister Jadav Zarif chuan Netanyahu chu thil hlui sawichhuak thar lehah a puh thung a, nuclear deal tihbuai tumna niin a sawi.