Donald Trump-an Kim Jong-un nena inbiakna neihna tur hmun a rawt

US President Donald Trump chuan North Korea ram hotu Kim Jong-un nena meeting an neihna tur atan Korea ram pahnihna inrina, Demilitarized Zone-a South Korea lam china Panmujon khua a rawt. He hmunah hian kar kalta Zirtawpni khan Korea ram pahnih hruaitute chuan meeting an lo nei tawh a ni.

Kim Jong-un hi kum 1953 Korean War hnuah North Korea hruaitu lu zinga South Korea ram leilung rap leh hmasa ber a ni. South Korea President Moon Jae-in nen hian Panmujon khuaa Peace House-ah meeting hi an nei a ni. NKorea hotu chuan an rama nuclear test site chu khar vek a tiam a, a kharna hun hman tur enfiah tur hian American weapon expert-te pawh a sawm a ni.

President Trump-an inhmu tura Kim Jong-un sawmna a pawm thu a sawi hnuah, ram pahnih hruaitute meeting neihna tura atan hian inbuatsaihna kalpui nghal a ni. Tun thla tawp lam emaw, June thla tir lamah emaw meeting hi an neih rin a ni. 

North Korea hian ballistic missile leh nuclear test a nei fo a, hei hi titawp turin US chuan a nawr fo a ni. Missile leh nuclear ralthuam a enchhin vang hian khawthlang ram hrang hrang bakah UN pawhin hrekna na zawk an lo siamsak tawh bawk.

Trump chuan a twitter-ah Kim nena meeting an neihna tur hmun atan hian ram hrang hrang pawh ngaihtuah a ni tih a sawi a, mahse Korea ram pahnihte inrinaa Peace House/Freedom House chu a remchang hlea a ngaih thu a sawi a, mahse hei hi ama ngaihdan mai a nih thu a sawi bawk.

Peace House hi kum 1953 Korean War tawpna tura hming an ziahna hmun kha a ni. He building hi chhawng thuma sang niin, Korean Peninsula inṭhen laia awm a ni a, United Nations thununna hnuaiah awm a ni.

Panmunjon khua bakah meeting neihna tur hmun atana ngaihtuah zinga hian Mongolia khawpui Ulaanbaaatar bakah Singapore te pawh an tel niin official-te chuan an sawi.