Afghanistan hmun hrang hranga pawikhawihna thlengah Journalist 9 thi

Afghanistan ram hmu hrang hrangah Thawhṭanni khan pawikhawihna a thleng a, kum 2001 hnua ni khat thilthua pawikhawihna thlen rapthlak ber ṭum a ni. Thawhṭannia pawikhawihna thlenga thi zingah hian journalist pakua an tel a ni.

Kabul-ah thihchilh bomb vawi hnih a puak a, mi 25 an thi a, thi zingah hian journalist pahnih an tel. Islamic State (IS) firfiak pawl chuan bomb hi an pawl tihpuah niin an sawi. Kabul police thupuangtu Hashmat Stanikzai chuan bomb pakhatna a puahna hmunah thil awmdan thlithlaia kal reporter-te awmna hmunah a hnu reiloteah a pahnihna hi tihpuah leh a nih thu a sawi. Bomb tipuaktu pawh hi journalist anga a inlan thu a sawi bawk. Interior ministry chuan Kabul-a bomb puakah hian mi 49 in hliam an tuar bawk niin a sawi a, hliam tuar zinga ṭhenkhat chu an dinhmun a ṭha lo hle a, hei vang hian thi zat pawh hi an la punchhoh a rinawm thu a tarlang.

Thawhṭanni vek khan Pakistan ramri bul, Khost province khawchhak lamah bomb a puak bawk a, he bomb puakah hian BBC reporter pakhat, kum 29 mi Ahmad Shah a thi a ni.

Kandahar province-a convoy bulah bomb tihpuah a ni bawk a, naupang 11 an thi. Hliam 16 awmin an zingah hian ramdang sipai leh Afghan sipaite pawh an tel a ni. He bomb tipuaktu hi eng pawl nge tih hriat a la ni lo.