Iran-in Israel PM thusawi chhang let

Israel Prime Minister Benjamin Netanyahu-an Iran-in a rukin nuclear programme a la kalpui reng a, a finfiahna document pawh an nei tia a sawi chu Iran chuan chhang letin, Israel PM chu dawt sawiah puhin Iran nuclear deal chung-changa US President Donald Trump hel tir a tum vang niin a puh.

Iran Foreign Ministry thupuangtu Bahram Qasemi chuan thuchhuah siamin, Israel ram hruaituin Iran nuclear programme kal pui chhunzawm zel a ni tia TV-a a document nena a tarlan chu thil zahthlak leh awmze nei lo niin a sawi. Israel PM thiltih dan chu dawt thu thehdarhna mai niin a sawi.

Netanyahu hian Thawhṭanni khan TV-ah Iran-in nuclear programme a ruka a kalpui chhunzawm zel thu sawiin, hemi finfiahna tur document-te pawh Israel intelligence agency chuan Iran nuclear secret archive aṭang a neih thu a sawi a, a file-te pawh a tilang tel a ni. Netanyahu chuan kum 2015-a Iran leh world power ram paruk-ten Iran nuclear programme tihtawpna tura inremna an siam hnuah, a rukin Iran chuan nuclear ralthuam hi a la siam chhunzawm reng a ni, a ti.

Kum 2015-a Iran nuclear deal siam hi tun thla hian a tawp dawn a, pawhsei a nih dawn leh dawn loh ngaihtuah a ni ang. Hetih lai hian US President Donald Trump chuan nuclear deal lo siam tawh hi a ṭha tawk loin a huam zau tawk lo a, hei vang hian pawhsei a duh loh thu te pawh a lo sawi tawh a ni. Iran

Foriegn Minister Mohammad Javad Zarif chuan Israel PM hian US hi 2015 nuclear deal aṭanga inhnuhdawh tir tuma ṭan laah a puh a ni.

Iran Defence Minister Brigadier General Amir Hatami pawhin Israel PM thusawi chu awmze nei lo niin a sawi a, Israel-in Palestinian mipuite a hrekbeh chungchanga a dik lohna thupbo leh mipuite rilru hruaikawi tuma thu sawiah a puh. Israel official-te chuan Iran ram an phiarrukna chu an titawp lo a nih chuan pawi an la ti hle dawn tiin a vau zui bawk.