Pakistan airport lian ber hawng

Pakistan Prime Minister Shahid Khaqan Abbasi chuan Thawhlehni khan an rama airport lian ber, Islamabad International Airport chu a hawng ta.

Islamabad International Airport hawn tur hi harsatna hrang hrang a awm avangin hun rei tak tihkhawtlai a lo ni tawh a ni. He airport hi Pakistan rama greenfield airport hmasa ber a ni bawk. Airport hi ram acre 4,238-a zau niin four-level passenger terminal, runway pahnih leh aircraft lian taka parking bay-te siam a ni.

Airport thar hawnni hian Pakistan International Airlines (PIA) thlawhtheihna chu ṭum tir chhin a ni.

PM Abbasi chuan airport thar chu a chhehvel bial tana hmasawnna thlentu a nih a beisei thu sawiin, sumdawnna kawngah leh hna thawh tur siamnaah a bul vela chengte hun ṭha tak a siamphah ngei a beisei thu a sawi.

Airport thar hi a hming thar tihfel a la ni lo a, mi tam takin prime minister hlui Benazir Bhutto hming chawitir tura rawtna an thlen chu PM hian a hnawl a ni. Airport hming atan hian Pakistan dintu Muhammad Ali Jinnnah-a farnu Fatima Jinnah te, an ram prime minister hmasa ber Liaqat Ali Khan leh khawvel huapa hriat lar social worker Abdus Sattar Edhi-te hming chawitir tura rawtna pawh a awm bawk.