Japan Prime Minister thar atan Fumio Kishida thlang

Japan Parliament chuan nimin khan an ram prime minister thar atan Liberal Democratic Party hruaitu thar, Fumio Kishida an thlang.

Kum 64 mi, foreign minister hlui Kishida hi Japan prime minister 100-na tur a ni.

Kishida-a'na thlak tak, PM hlui Yoshihide Suga chuan September 3 khan LDP hruaitu dinhmun a chuh tawh dawn loh thu a lo sawi tawh a, hei vang hian rorellai party hruaitu thar tur hi kar liam ta khan thlan niin, Kishida hian vote 257 hmuin a khingpui Taro Kono chuan vote 170 a hmu a ni.

PM thar hian a cabinet member turte pawh a puang fel nghal a, kumin November thlaah inthlanpui an neih dawn vangin hemi atan hian an inbuatsaih pawh a ngai nghal dawn a ni.

Cabinet member zingah a zahve aia tam chu mi thar an ni a, mahse Suga hunlaia cabinet minister lo ni tawh, dah chhunzawmte chuan ministry pawimawh zualte an chang thung. Foreign minister Toshimitsu Motegi leh defence minister Nobuo Kishi-te pawh an chanvo ngai pek an ni. Cabinet tharah hian hmeichhia pathum telh an ni bawk.

Kishida hi moderate-liberal politician tia hriat a ni a, hei vang hian a kaihhruaina hnuaia rorellai, conservative party kalphung pawh a her danglam deuh rin a ni. Sawiselna awm mah se, an party lam chuan hruaitu atana an lo hual lawk sa nia sawi a ni, veteran politician lam pawhin an thlawp ṭha hle.

Prime Miniter thar politician chhungkua aṭanga chhuak niin, a fapa leh a pu pawh hi House of Representatives member an ni ṭhin. Kum 2012-2017 chhung khan foreign minister niin, he dinhmun chelh rei thei ber a ni. Hiroshima khaw chhuak a nih avangin nucelar ralthuam hman dodaltu langsar tak a ni bawk.