North leh South Korea-ten hotline tinung leh

North Korea leh South Korea chuan an ramri bula inbiakpawhna, hotline chu nimin khan an tinung thar leh a, August hnu lama a ṭum khatna atan ram pahnih official-te chu phone-in a inbe leh ta a ni.

Seoul-a unification ministry chuan,"South-North inbiakpawhna tihnun leh a nih hnuah Korea ram pahnih inkara inremna lungphum pawimawh tak siamṭhat leh dan turte sawi a ni" tiin a sawi. Ram pahnihte inbiakna leh inṭhianṭhatna tundin leh a nih theihnan inremna mumal tak siam tumin hma an la tih a sawi bawk.

NKorea state media, KNCA pawhin an ram hotu, Kim Jong-un chuan Korean Peninsuila-a inrem­na tluantling a awm theihna turin North-South inbiakpawhna tihtawp tawh chu tihnun leh a duh thu pawh a lo sawi tawh a ni, a ti. An ram huna nimin zing dar 9 khan line te chu tihnun leh a nih thu a sawi a ni.

US State Department thupuangtu pawhin Korea ramte thawhdunna a thlawp thu sawiin, line tihnun leh a ni chu "Korean Peninsula-a boruak muanawm tak a awm theihna tur atana peng pawimawh tak" tiin a sawi.

NKorea hian ramria Kae­song khuaa ram pahnihte office inṭawm neih chu tichhiain, an inbiak­pawhnate pawh a lo titawp vek tawh a, hei hi activist-ten NKorea dodal leh sawichhiatna leaflet an tihchhuah thin SKorea sorkarin dang tura hma a lak ṭhat duh lo vang niin a sawi.

Ram pahnihte hian kumin July 27 khan line zawng zawngte siamṭhat an nih thu sawi mah se, NKorea lam hian call hi an chhang duh chuang lo a ni. Mahse nimin aṭang khan hotline chu tinung lehin, an inbepawp leh ta a ni.