Iran nuclear deal : UN-in Trump-a inhnukdawk lo turin a nawr
United Nations Secretary-General Antonio Guterres chuan Iran nuclear deal siam tawh chu a thlakna tur ṭha tak a awm a nih loh chuan tihtawp mai tur a ni lo tiin, US President Donald Trump chuan Iran-in nuclear ralthuam a siam tur venna atana inremna lo siam tawh aṭanga inlachhuak lo turin a nawr. Guterres chuan kum 2015-a Iran leh world power ram paruk-ten inremna an lo siam tawh hi vawnnun zel a nih loh chuan indo chhuah palh mai pawh a hlauhthawnawm dawn niin a sawi.
Iran nuclear deal hi US President hmasa, Barack Obama hunlai, kum 2015-ah Iran leh world power ram paruk–US, China, Russia, Germany, France leh Britain ten Iran nuclear programme khuahkhirhna tura an siam an ni. He inremna siam vang hian khawthlang ramten Iran ram an hreknate hlih a ni. Mahse President Donald Trump chuan he inremna siam hi a ṭha tawk lo tiin a sawisel a, May 12-a inremna siam huntiam a tawp hnuah pawhsei tur chungchangah an tel zui dawn leh dawn loh a la tichiang lo a ni.
Hetih lai hian Israel Prime Minister Benjamin Netanyahu chuan Iran hian a rukin nuclear ralthuam a la siam chhunzawm reng niin a puh a, a puhna finfiahna tur document-te pawh TV-a thu a sawiah a tilang a ni. Mahse Iran chuan Israel PM puhna hi thu dik lo niin a sawi thung.
Kum 2015-a nuclear deal an siam hi Joint Comprehensive Plan of Action (JCPOA) tia sawi a ni a, he inremna hnuaiah hian Iran chu uranium sawngbawlna atana a khawl hmante titlem tura tih a ni. Hemi hnu hian Iran-a Natnaz leh Fordo site-a khawl pawh titlem nghal niin, uranium ton eng emaw zat chu Russia ramah phurh a ni. IAEA monitor-te pawhin Iran hian inremna hi a takin a kalpui em tih enfiah turin nuclear site-te an tlawh bawk.
President Trump chuan he inremna siam tawh hi awmze nei lo, inremna siam tawhah la chhe ber niin a sawi. Inremna siamṭhatna tura a rawtna neihte chu ngaihtuah a nih loh chuan he inremna aṭanga inhnuhdawhah a vau a ni. Inremna siamin hun bitiam chhung bik atana Iran nuclear programme chungchang chauh a huam chu a duh lo a, hei hian ballistic missile kawngah khuahkhirhna a siam tel lo a ni, a ti.