Nikol Pashinyan-an nawrh a titawp

Armenia-a rorellai, Republican Party chuan Parliament member hmun thuma ṭhena hmun khatin prime minister tura candidate an rawt chu eng party pawh ni se a thlawp dawn tih a sawi a, hei vang hian candidate awmchhun eptu pawl hruaitu Nikol Pashinyan pawhin a nawrh huaihawt a titawp ve nghal a ni.

Armenia Parliament hian Thawhlehni khan prime minister tur an thlang a, candidate awmchhun Nikol Pashinyan chuan PM tling tura vote hmuh ngai zat a hmu pha lo a, hei vang hian prime minister hi an la nei lo a ni. Ni sarih chhungin vote an la ṭha leh ang a, hemi hunah hian PM hi an thlang hlawhchham leh a nih chuan Parliament ṭhiat a, inthlan ṭhat buatsaih a ngai tawh dawn a ni.

Parliament-in PM thar tur a thlan hlawhchham avang hian Pashinyan leh amah thlawptute chuan Thawhlehni aṭang khan rampum huapin nawrh an huaihawt nghal a ni. Pashinyan chuan rorellai party-in an thlawp duh lo chu ram mipuite zah lohna lian tak niin a sawi.

Hemi hnu hian Republi-can Party chuan candidate hran siam loin, parliament member-te nominate chu tupawh ni se May 8-a inthlan neih leh hunah an thlawp dawn tih an sawi.