Japan-ah danpui siamthat duh loin nawrh huaihawt

Japan Prime Minister Shinzo Abe-an an ram Danpui siamṭhat a tumna duh lohna lantirin an ram Constitution Memorial Day vawi 71-na, Ningani khan an ram khawpui hrang hrangah mipuiten nawrh an huaihawt.

Tokyo-ah chuan mi 60,000 vel pungkhawmin Rinkai Disaster Prevention Park-ah kawng an zawh a, kawngzawh zingah hian zirlai, legal expert leh eptu party hruaitute an tel. Mipui kalkhawmte chuan banner leh flag-te kengin, Article 9 thlak danglam an duh loh thu te, Abe-a kaihhruai sorkar chu bang tura an phut thute an aupui a ni.

Eptu pawl Japanese Communist Party hruaitu Kazuo Shii chuan Constitution-a Article 9 chu thlak danglam a nih chuan, Japan Self Defence Force (SDF) chu ram pawn lama indonaah te tirh an ngai dawn niin a sawi a, hei hi an duh loh thu a sawi.

Osaka, Fukuoka leh Hokkaido bakah khawpui dangah pawh nawrh hi huaihawt a ni bawk.

Hetih lai hian Tokyo-ah vek hian ram danpui siamṭhat thlawptute an pungkhawm a, heng mite hmaa PM Abe-a thusawi video message tihchhuaha, Abe chuan an ram danpui-a SDF dinhmun tak tihchiang tura sawiho a hun thu a sawi. He inkhawmah hian mi 1,200 vel an tel a ni.

Japan ram danpui hman mek hi Indopui II hunlaia ṭangrual ramten an awp laia siam a ni. He danpui hi kum 1947, May 3 a hman a nih aṭang khan ennawn leh siamṭhat a la ni lo. Danpui-a Article 9 hian hriat lar a hlawh a, he Article hian Japan chuan indona chu buaina chinfelna kawnga ni lo tiin , khawmual, tuipui leh boruak sipaite leh a theihna dangte pawh indona kaihhnawihah inhnamhnawih tir an ni lo ang, tih a ni.

PM Abe leh rorellai Liberal Democratic Party (LDP) chuan ram danpui ennawn a siamṭhat hi an duh a, kum 1950 chhoa LDP din a nih pawh khan an hmalakna pakhat an ram danpui ennawn hi an telh a ni.