Myanmar sipaite chet danah ASEAN lawm lo
Association of Southeast Asian Nations (ASEAN) chuan Myanmar sipaite chuan an rama boruak ṭha a awmna tura hma an lak ṭhat tawk loh vangin an lawm lo hle.
Thawhṭannia meeting an neihah, ASEAN foreign minister-te chuan Myanmar sipai sorkar chetdanah an lawm lo hle tih sawiin, sipaite rorel dan chu an hmathlir nen a inmil lo tih Indonesia foreign minister Retno Marsudi chuan a sawi. Myanmar sipaite chuan remna a awm theihna tura ruahmanna an siam chu an bawhzui ṭha tawk lo a ni, a ti.
ASEAN hian kumin February 1-a sipaite'n Myanmar civil sorkar thuneihna an hnehchhuh avanga ramchhunga buaina nasa tak thlengte chinfel a, boruak ṭha a awm theihna tura ṭanpui an inhuam thu an sawi tawh a ni. Sipai hotute nen pawh inbiakna neihpui tawhin, boruak ṭha a awm theihna atana hmalakna tur inremna pawh an lo siampui tawh bawk.
Mahse Myanmar sipaite hian ASEAN palaite hian a thawhpui ṭha tawk lo a, hma pawh an sawn thei lo nia sawi a ni. Hei vang hian an lawm lo hle a, ASEAN special envoy chu an thawhpui ṭha duh lo a nih chuan tun thlaa ASEAN summit neih turah Myanmar chu telh an nih loh tur thu Marsudi chuan a sawi.
Hetih lai hian Myanmar specian envoy atana ruat, Brunei second foreign minister Erywan Yusof chuan Myanmar ram a tlawh dan tura sipaite hi inbiakna a la neihpui mek. Yusof hian sipai hotute bakah party hrang hrang hruaitu, Aung Sang Suu Kyi leh sipaiten thuneihna a hnehchhuh hnua official dang an hrente pawh hmuh tel a duh a, hei hi sipai lam hian an la remtih pui thei lo nia sawi a ni.
United Nations secretary-general Antonio Guterres chuan special envoy atana Yusof ruat a ni chu a lawmawm thu a sawi a, hemi rual hian Myanmar chungchangah ASEAN chu che muang lutukah a ngai a, tualchhung buaina leh chhiatna nasa zawk thleng tur venna atan a chhehvel ram leh ram dangte chu inlungruala chak taka an chet a ngai a ni, a ti.
Sipai rorelna duh lohna lantira nawrh huaihawt leh sipaite inbeihna thlengah mi 1,100 chuang chu sipai kut tuarin an thi tawh a, mi sang tel man an ni tawh bawk.