Lebanon-ah parliament inthlan buatsaih

Lebanon-ah nimin khan Parliament inthlan neih a ni a, hei hi kum 2009 hnua inthlan an neih lehna hmasa ber a ni.

Parliament term hi kum li a ni a, mahse kum 2009-a inthlan neih hnuah an term hi ṭum hnih pawhsei a nih avangin kum rei tak inthlang loin an awm a ni. Parliament term pawhsei a nih chhan hi an ṭhenawm ram Syria ram boruak ṭhat tawk loh vang leh, an ram inthlan dan siamṭhat anih theih nana tih a ni.

Electoral law siamṭhat a nih hnuah voting system thlak danglam a ni a, district awm zat pawh tihtlem niin, ram pawn lama awmte pawh vote thlak phalsak an ni bawk.

Parliament seat 128 atana vote thlak theih hun hi an ram huna zan dar 7 thleng hawn a ni a, inthlan result kimchang hi vawiin emaw, naktukah emaw tihchhuah beisei a ni. A ṭum khatna atan ramdanga tlanchhia, Lebonon mite chuan kar hmasa kar tir lam khan an awmna ramah vote an lo thlak tawh a ni. US leh ramdangten firfiak pawla an puan, Hezbollah pawl chuan parliament member tam zawk neih theih tumin ṭan an la hle.

Lebanon hian sakhaw pawl hrang hrangte inkarah thuneihna insemzaina tur, power-sharing political system chu hun rei tak a kalpui tawh a ni. Parliament-a seat awm zat hi Kristian leh Muslim-te insemtir niin, president, prime minister, leh parliament speaker-te chu sakhaw pawl hrang ami an ni tur a ni.

Prime Minister ṭanglai Saad al-harri chu nikum November thla khan Saudi Arabia ramah tlanchhiain, thah tuma beih a nih mai a hlauhawm nia sawiin TV-a thu a sawinaah PM aṭanga a ban thu hi a puang a ni. Mahse President Michel Aoun nena an inbiak hnuah a banna thehluh tur hi a tikhawtlai a, December thla khan a ban tumna hi a hnukdawk leh a ni.

European Union chuan Lebanon-a inthlan enfiah tur hian district tinah observer a tirh thu a sawi.