UNSC seat inchuhna aṭangin Israel inhnukdawk

United Nations Security Council (UNSC)-a non-permanent member zing aṭanga seat chan tuma inumna aṭangin Israel chu a inhnukdawk.

UN-a Israel mission chuan Zirtawpni khan thuchhuah siamin, an thawhpui leh ṭhianṭha ramte an biak hnuin, Israel chuan UNSC-a seat chan tuma a beihna chu a titawp tih a sawi. Hemi rual hian UN-a thutlukna siamna kawngah Israel chu a tel ve theihna turin a ṭhianṭha ramte chu a thawhpui chhunzawm zel dawn tih a sawi.

Israel a inhnuhdawh tak avangin 2019-2020 chhunga Security Council-a Western Europe leh Other regions tana seat pahnih dah chu chuhtu awm loin Belgium leh Germany ten an chang thei dawn ta a ni. Mahse heng ram pahnihte hian June thlaa General Assembly neih huna vote lakah member hmun thuma ṭhena hmun hnihte vote an hmuh tho a ngai dawn a ni.

UN Security Council-ah hian member 15 an awm a, heng zingah hian member nghet, permanent member panga awmin non-permanent member 10 an awm a ni. Non-permanent member 10-te hi kum hnih term atan General Assembly -ah thlan niin, kum tinini panga thlan thar an ni ṭhin. Belgium leh Germany hi thlan tlin an nih chuan Netherlands leh Sweden an thlak dawn a ni.