Russia President atan Putin lalut

Russia President ṭanglai, Vladimir Putin chu president term li a chelhna turin nimin khan lakluh a ni.

Vladimir Putin hian kum 18 chhung ro a rel tawh a, hemi chhung hian prime minister leh president dinhmun te a chelh a ni. Eptute chuan tsar hunlaia rorel nen tehkhinin, president atana lakluh a ni leh tur hi duh loin khawpui hrang hrangah nawrh an huaihawt a ni.

Nimina Kremlin-a president atana lakluh a nih lai pawh hian eptu lam hian lungawi lohna an lantir a ni.

March thlaa inthlanah khan Putin hian vote tla aṭanga 76% chuang hmuin hneh taka thlan tlin a ni. Mahse international observer-te chuan inthlan hi a felfai tawk lo niin an sawi a, vote tihchingpen pawh a awm niin an sawi.

Kum 2000 khan a ṭum khatna atan Putin hi Russia president-ah thlan tlin a ni a, kum 2004 khan thlan nawn leh a ni. Mahse a zawna president term hnih a chelh avangin kum 2008 inthlan khan a chuh thei lo a, amah thlawptu Dmitry Medvedev chu president-ah thlan niin Putin hi prime minister-ah a awm thung a ni. Kum 2012 khan President atan thlan leh niin, president term hi kum ruk atan pawhsei a ni. Kumin inthlanah thlan nawn leh niin president a nih ṭum li-na tur a ni a, kum 2024 thleng a chelh dawn a ni.