US nawrna vanga inbiakna nei tur kan ni lo: North Korea

North Korea chuan an ram hotu Kim Jong Un leh US President Donald Trump-ten inbiakna an neih tur chu US in a nawrna avanga nei tur an ni lo tih a sawi.

Kim leh Trump-te meeting neih tur hi NKorea leh US hruaitu ni laiten meeting an neihna hmasa ber tur a ni. An inhmuh hun tur leh meeting neihna tur hi puanzar a ni thuai dawn tih Trump chuan a sawi.

Korea ram pahnih hruaitute chu an inri-na demlitarized zone (DMZ)-ah an lo inbe tawh bawk a, ram phnihten remna leh muanna awm theihna atana thawhdun chungchangte an sawidun a ni. NKore hotu Kim chuan an rama nuclear ralthuam awm ṭhinna hmunte chu tihtawp vek a tiam a ni. Kim chuan an rama nuclear site an khar lai chu enpui leh finfiah turin US expert leh journalist-te a sawm bawk.

South Korea President Moon Jae-in nena an inkawm ṭum hian Kim Jong-un chuan an ram hun, time zone chu South Korea nena inmil tura dah a lo tiam tawh a, a tiam angin kar kalta Zirtawpni aṭang khan NKorea chuan an sana chu minute 30-a herh hmain SKorea hun milin an dah ta bawk. Korea ram pahnihte hian time zone in ang an hmang ṭhin a, mahse kum 2015 khan NKorea hian minute 30 in an sana hi an herh tlai a ni. Mahse hei hi thlakin time zone in ang an hmang leh dawn ta a ni.