France sakhaw puithiamte'n naupang an khuaikhem hnem

France rama Catholic Kohhrana puithiam leh rawngbawltu dang eng emaw zat chuan kum 1950 aṭang khan naupang 2,16,000 vel zet an khuaikhem niin report chuan a tarlang.

Kohhran rawngbawltuten naupang an khuaikhem dan chhui chiang tura invesigation commission din chuan Thawhlehni khan report hi a tichhuak a ni. Investigation commission hotu Jean-Mawrch Sauve chuan naupang khuaikhemtute hi puithiam leh koh­hrana rawngbawltu dang 3,000 vel zet an ni tih a sawi. Naupang an khawih zinga 80% hi mipa naupang an ni a, a tam zawk chu kum 10-13 inkar an ni bawk.

Report hi online-in an tichhuak a, heng thil thleng hian a tuartu nunah nghawng ṭha lo a nei zui nasa tih sawiin, an zinga 69% vel chuan an rilru leh taksa lamah harsatna lian tak an nei zui a ni, tiin a sawi. Kohhrante chu hetiang thil ṭha lo thleng tur venna kawnga hmalakna nei ṭha tawk loha a puh a, a tuartu lamte venhim aiin kohhran himna tur chu an ngaihven zawk niin a puh. Report an tihchhuah hi phek 2,500 zeta chhah a ni.

Naupang khuaikhem chungchang chhuitu tur commision hi kum 2018 kum tawp lama France rama Catholic bishop-ten an din a ni. Commission hian kum 1950 aṭanga chhui ṭanin, kum hnih leh a chanve chuang chu court, police leh kohhran record hrang hrangte an zir chiang a, khuaikhem tawk nia sawi zinga mi 2,700 zet chu anmahni ngei an kawm bawk.

Sauve chuan an thil chhuichhuah zinga case 40 chuang chu thubuaia ziahluh leh tur chuan a rei tawh lutuk niin a sawi a, mahse kohhran hotute hnenah an buaipui tura hlan a ni, a ti. Kohhran hnena hetiang thil a thlen tawh lohna tura invenna kalpui dan rawtna a siam 45 zet chu Commission hian a tichhuak bawk.

Reims archbishop leh Conference of Bishops of France hotu, Eric De Moulins-Beoufort chuan report chuan bomb ang maia a den thu sawiin, ngaihdam a dil nghal a, a ṭul angin action an la zui dawn tih a sawi. Commission-in khuaikhem tawk a chhui chhuah chu an rin phak bak a nih thu leh zahthlak a tih thu a sawi.

Catholic kohhran hotu lu, Pope Francis chuan commission-te thil hmuh­chhuah chuan a ti na tak zet tih a sawi bawk. Hemi rual hian thil dik lo thlengte hriatchhuah a nih theihna atana a tuartuten an chunga thil thleng huaisen taka an sawichhuak chu lawmawm a tih thu a sawi nghal bawk a ni.

France Catholic Church chuan khuai­khem tawkte hi zangnadawmna pek an ni dawn tih a sawi a, nakkum kumtir lam aṭanga pek chhuah ṭan a tum.