Dubai Expo neihna hmun sak chhungin mi 3 an thi
Dubai-a World Expo 2020 neihna hmun tur siam chhungin thawktu zinga mi pathum an thi a, mi dang 72 in hliam an tuar niin official-te chuan an sawi a, expo neihna tur hi a him ṭha tawk tih an sawi bawk.
World Expo neihna hmun siamna kawngah United Arab Emirates (UAE) chu hnathawktute a chhawr danah human rights a palzut nasa nia sawiin, European Parliament-ah chuan he fair neih tur hi boycott an phut a, hei vang hian UAE hi a insawifiah nghal a ni.
Dubai khawpui daia Expo neihna tur, pavilion za tel leh hmun dangte siamnaah hian hnathawktu nuai hnih chuang chhawr an ni. Expo chuan thuchhuah siamin, "Hnathawhna hmuna chetsualna thlengah thawktu pathum an thi a, mi dang 72 in hliam an tuar tawh a ni," tiin thawktute dinhmun chu ngaih pawimawh ber a nih thu a tarlang. Hmun danga expo neihna tur siamnaa chetsualna lo thleng tawhte aiin a tlem zawk niin an sawi bawk.
Thuchhuahah hian expo neihna tur hmun siamna atan hian darkar maktaduai 247 hun hman a nih thu an sawi a, he huna tel tur, a chhim turte zawng zawng himna chu an dah pawimawh hle tih an sawi.
France foreign minister Jean-Yves Le Drian chuan Expo neihna tur hi kar liam ta khan a lo tlawh tawh a, European Parliament resolution siamah chuan France chu a tel ve lo tih a sawi a ni.
World Expo 2020 hi nikum October 20 aṭanga neih tura tih kha a ni a, mahse hri leng avangin a hun hi sawn a ni a, kumin October 1 aṭang khan neih ṭan niin thla ruk chhung neih a ni dawn a, nakkum March 31-ah khar a ni ang. Expo neih chhung hian nitin show 60 neih a ni ziah a, ram hrang hrang 190 chuangin pavillion an siam a, expo neihna hmunah hian restaurant pawh 200 siam a ni. Expo hi chhimtu maktaduai 25 vel awm tura beisei niin, heng zinga 70% chu ram pawn lam aṭanga kal tura beisei an ni. Expo 2020 thupui atan hian "Connecting Minds and Creating the Future" tih hman a ni.