Taliban-te'n Kabul-a Gurudwara suasam

Afghanistan khawpui, Kabul-a Sikh ho inkhawmna, Gurdwara Karte Parwan chu Thawhlehni khan Taliban official ṭhenkhat, ralthuam nena inthuamten suasamin, he hmuna lo awm mi eng meaw zat chu an hreng zui nghal bawk.

India World Forum president Puneet Singh Chadhok chuan, "Kabul-a Gurswar Karte Parwan chu ralthuam nena inthuamin Taliban official-ten an luhchilh tih report kan dawng a ni. Gurdwara chhunga lo awmte pawh an man zui bawk. Tualchhung mite sawidanin,Gurdwara-a CCTV camera chu tichhiain he hmun hi an suasam zui bawk a ni," a ti.

Karte Parwan Gurdwara hi Kabul khawpui hmarthlang lama awm a ni.

A hma pawhinAfghanistan khawchhak lam, Paktia province-a Gurdwara inchunga Nishan Sahib - Sikh holy flag an tar chu Taliban-te hian an lo lak thlaksak tawh bawk.

Paktia-a Chamkani huamchhunga Gurdwara hi Sikh sakhua hmuchhuaktu Guru Nanak pawhin a lo tlawh tawh a ni.

Taliban-ten Afghanistan-a thuneihna an chan hunah an ramchhunga sakhaw leh hnam tlem zawkte chuan beih leh kutthlak bakah enhran an tawk chho leh mek nia sawi a ni.

Kabul-ah Mullah Baradar let leh
Taliban sorkara deputy prime minister Mullah Abdul Ghani Baradar chu Kabul-ah let lehin a hna ngai a thawk leh ṭan a, mahse khawthlang ramten firfiak an lo puan tawh Sirajuddin Haqqani kaihhruai interior ministry-in venhimna pek a tum chu a dawng duh lo.

Intelligence report tarlan danin, Baradar hi Haqqani pawl nen an inbeih ṭuma a inhliam avanga thla khat dawn an ram a chhuahsan hnuah, Thawhlehni khan Kabul-ah hian a let ta a ni. Haqqani lamte nena an intihbuaina avangin a thi niin thu pawh a thang hman a, mahse September 13 khan audio message hmangin a thi lo tih hi a lo sawifiah tawh a ni.

Interior ministry chuan deptuy PM Baradar venhimna pek tur hi an buaipui tur niin sawi mah se, Baradar hian lo hnarin amah vengtu turte hi aman a ruat zawk tih a sawi.

Baradar hi Kabul Palace-ah a cheng nghal a, hetih lai hian a thachhangdawltu leh defence minister Mullah Yaqoob chu Kandahar-ah a la awm thung. Sirajuddin Haqqani chu Kabul-ah a awm bawk.

Kabul watchers sawidanin, Taliban co-founder Baradar lo let leh hian sorkar rorelnaah boruak rit tak a rawn ken luh tel rin a ni. Haqqani pawl leh Yaqoob pawl lamte hi an inep hle a, hei bakah hian Taliban hruaitu tinte karah pawh inrintawk lohna a awm a, an thawkho ṭha lo hle bawk a ni.

Afghanistan-a Taliban sorkar hi eng ram mahin an pawm thu an la puang lo a, Taliban thlawptu ram - China, Qatar, Pakista leh Turkey-te pawhin an la pawmpui lo a ni.