Kum 2050-ah mi tld 5 chuangin tui indaih lohna tawk dawn : UN

United Nations agency, World Meteorological Organization (WMO)-in report a tihchhuahah kum 2050-ah chuan khawvela mihring zinga tluklehdingawn nga chuangin tui indaih lohna an tawk dawn niin a tarlang.

WMO chuan khawvel sik leh sa inthlak danglam chak chuan tuilian leh khawkheng thlengin nghawng a nei zel dawn a, hei vang hian tui indaihlohna a pung chho zel dawn a ni, a ti.

"Kum 2018-ah khan khawvela mi tluklehdingawn 3.6 vel chuan kum khata thla khat tal tui duhkhawp nei loin an awm a, hei hi kum 2050-ah chuan tluklehdingawn 5 chuangah an pung tawh dawn a ni," tiin "The State of Climate Services 2021: Water" tih hmanga report an siamah an tarlang a ni. Hei vang hian water management lama thawhhona tura hma lak vat a ṭul thu leh climate policy siam a ṭul thute a sawi bawk.

World Meteorological Organiza­tion Secretary-General Prof. Petteri Taalas chuan, "Khaw lum belh zel hian khawvel pumah nghawng a nei a, ruahtui tlak dante pawh a inthlak danglam a, agricultural season thlengin a danglam a ni. Hei hian ei tur leh mihring hriselna lam thlengin a nghawng zui bawk," tiin a sawi.

Kum 20 liam ta chhung khan leilunga tui awm, tui chhekkhawl, lei hnawng leh vurte thlengin kumtin cm khat zelin a tlahniam a ni. Hetih lai hian khawvela tui awm zinga 0.5% chauh chu hmannawn tlak leh tui thianghlim a ni thung.

Tui kaihhnawiha chhiatna thleng pawh kum 20 chhung khan a thleng tam hle. Kum 2000 hnu lamah a hma kum 20 liam ta aiin tuilian leh a kaihhnawih chhiatna chu khawvelah 134% in a thleng tam tawh zawk bawk. Heng chhiatna thleng zinga a tam zawk hi Asia khawmualpuia thleng an ni.