US Senator-ten Russia palaite hnawtchhuak turin Biden ngen

US-a Democratic leh Republican senator-te chuan Moscow-in United States palaite tan visa tam zawk an pechhuak duh lo a nih chuan an ramchhunga Russia palai awm mekte chu hnawt chhuak turin president Joe Biden an ngen.

Party pahniha Senator 17-te chuan President Biden hnenah ngenna hi thlenin, an zingah hian Senate Intelligence and Foreign Relations committee hotute pawh an tel. President hnena lehkha an thawnah, United States-ah Russia palai 400 chuang an awm laiin, Russia-ah chuan US palai 100 vel bawr chiah an awm thu an sawi.

"Ram pahnihin palai kan neih zat a inthlau lutuk hi pawm thiam a harsa a ni. Russia chuan America rama Russian palai awm zat leh Russia-a US palai awm zat inthlau lutuk sutkiannan Russia hian visa tam zawk an pechhuak ve tur a ni," an ti.

"Hmalakna kan hmu vat lo a nih chuan an rama US palai awm zat ang chiah nei turin Russian palaite hi hnawtchhuak turin kan ngen che a ni," tiin lehkhathawnah hian an ziak.