Jerusalem-a US embassy hawnnaa tel tur puang US-in embassy road sign a tar tawh

US chuan May 14 hian Israel-a a embassy chu Tel Aviv aṭangin Jerusalem-ah a sawn tawh dawn a, embassy hawnnaa tel tur hi White House chuan Thawhṭanni khan a puang nghal a, President Donald Trump a tel ve lo.

White House chuan Jerusalem-a US embassy hawnna neih turah hian sorkar aiawhin mi panga an tel dawn tih a puang a, heng zingah hian President Trump-a fanu Ivanka Trump leh a pasal, President

adviser Jared Kushner, US Treasury Secretary Steven Mnuchin, Israel-a US ambassador David Friedman leh Trump-a Middle East envoy Jason Greenblatt te an ni.

Nikum December thla khan President Trump chuan Israel khawpuiah Jerusalem a pawm thu puangin, Tel Aviv-a US embassy pawh Jerusalem-a sawn a nih tur thu a lo sawi tawh a ni. Hei hi ram hrang hrangten an sawisel nasa hle a, a bikin Palestinian mite chuan na taka dodalin hmun hrang hrangah lungawi lohna an lo lantir tawh a ni. Palesti-nian negotiator Saeb Erekat chuan US policy hi

sawiselin, embassy sawn tur chu dan kalh a nih bakah Isarel leh Palestine inkara inremna kawng zawnga hmalakna te pawh a tichhe thei dawn niin a sawi a ni.

US Senate chuan March thla khan Israel-a a ambassador tura David Friedman ruatna chu a lo pawm tawh bawk a ni. Ambassador atana Friedman ruat a ni chu Israel Prime Minister Benjamin Netanyahu chuan lawmawm a tih thu sawiin, President Trump aiawhte chu Israel chuan an lo lawm tur thu a sawi.

Thawhṭanni khan Jerusalem-a embassy a dahna turah hian 'US Embassy' road sign tarchhuah a ni a, road sign hi English, Hebrew leh Arabic ṭawngin tar a ni.

Israel foreign ministry thupuangtu chuan May thla tawp lam hian Paraguay pawhin Jerusalem-ah embassy a hawng dawn tih a sawi.