Nigeria: Boko Haram te kut aṭangin mi 1,000 chhanchhuk

Nigeria sipaite chuan an ram hmarchhak lama Boko Haram helpawlte kut aṭangin an mi hren mi 1,000 chuang an chhan chhuak tih an sawi.

Sipai thupuangtu Brigadier General Texas Chukwu chuan Thawhṭanni zan khan Borno state-a thingtlang khaw pali aṭangin helho hren mi tam tham tak chhanchhuah an nih thu hi a puang a ni. Hel kut aṭanga an chhanchhuahte hi a tam zawk chu hmeichhia leh naupang an ni a, chhanchhuah an nih theihna atan hia Nigeria, Cameroon, Chad, Niger leh Benin sipaite telna, Multinational Joint Task Force-ten an pui a ni.

Hel kut aṭanga an chhanchhuah zingah hian helhoin an mi hren, an pawla an tel luihtir te an tel. Boko Haram hi kum kua zet Nigeria sorkar lakah a hel tawh a, hemi chhung hian mi tam tak, a bikin hmeichhia an rubo tawh a ni. Kum 2014, April thla khan Chibok khua aṭangin school naupang hmeichhe tleirawl 276 zet an rubo a, heng zinga eng emaw zat chu chhanchhuah an ni tawh a, mahse 100 vel chu an chin hriat lohin an la awm mek.

Sipaiten hel kut aṭanga an chhanchhuahte hi Borno State khawpui, Maiduguri-a damdawi-in hrang hrangah an hriselna endik tura hruai an ni a,enfiah an nih hnuah an chhungte hnenah hlan an ni ang.