Iran nuclear deal atangin US inhnukdawk
US President Donald Trump chuan kum 2015-a Iran leh world power ram paruk–US, UK, France, Germany, Russia leh China-ten Iran nuclear programme khuahkhirhna tura inremna an lo siam tawh aṭangin US chu a inhnukdawk tih Thawhlehni khan a puang.
Iran nuclear deal siam hi tun thla hian a tawp dawn a, pawhsei tum a ni. Mahse President Trump chuan he inremna siam hi a ṭha tawk loin a huamzau tawk lo a, pawhsei a duh loh thu a lo sawi tawh a ni. Mahse inremna siamnaa tel ram dangte chuan Trump hi he inremna siam aṭanga inhnukdawk lo tura ngenin, siamṭhat ngai nia sawite pawh ngaihtuah ṭhat an inpeih thu pawh an sawi a ni. Mahse heti chung hian Trump chuan inremna siamah hian an tel zui zel theih loh thu a puang ta a ni.
Kum 2015-a Iran nuclear deal siam, Joint Comprehensive Plan of Action (JCPOA) tia sawi hnuaiah hian Iran chu nuclear programme a kalpuinaah khuahkhirhna siam sak niin, nuclear ralthuam siam lo tur pawhin an intiam a ni. Hemi chhan letna atan hian khawthlang ramte chuan sum leh pai lama Iran an hrekna hlipin, oil leh gas pawh a hralhchhuah phalsak a ni.
Inremna an siam hnuah International Atomic Energy Agency (IAEA) chuan Iran nuclear site-te tlawhin, inremna thuthlung a zawm leh zawm lohte an enfiah a, Iran hian a intiamna chu a zawm ṭhat thu pawh an sawi.
President Trump-an nuclear deal aṭanga US a inhnuhdawh thu a puan hnua White House thuchhuah chuan president hian thuneitute hnenah Iran hrekna tur pawh buaipui ṭan leh nghal turin a ti niin a tarlang. US-in Iran hrekna a siam ṭhat tur hian sector pawimawh tak tak energy, petrochemical, leh financial sector lamte a huam dawn nia sawi a ni. Iran hrekna thar hi ni 90 chhunga hman tum a nih thu US Secretary of Treasury Steven Mnuchin chuan a sawi.
Trump hian kum 2016 US President inthlan dawna a campaign-naah pawh khan 2015 nuclear deal hi inremna siam tawh azawnga la chhe ber nia sawiin, President atana thlan tlin a nih chuan he inremna tihtawp hi a lo tiam tawh a ni. He inremna siam hian Iran-in nuclear ralthuam a siam leh, firfiak ho a puih ṭhinna a veng lo niin a sawi. He inremna hi pawm zui zel a nih chuan Middle East-ah nuclear ralthuam neih lamah intlansiakna nasa tak siamin, ram dangte pawhin Iran-in nuclear ralthuam a neih ruala neih ve zel an tum dawn a ni, a ti.
Iran nuclear deal chungchanga US President Trump-a thutlukna siam hi an ramchhung leh ramdang inhnialna a chawk chhuak nasa hle. France, Germany leh Britain hruaitute chuan thuchhuah inṭawm siamin US thutlukna siam dan chu pawi an tih thu an tarlang. Emmanuel Macron, Angela Merkel leh Theresa May-i te chuan nuclear deal chu vawnnun chhunzawm zel an tum thu an sawi bawk.
Iran President Hassan Rouhani chuan he inremnaah hian an ram chu an tel chhunzawm zel tur thu a sawi a, Iran foreign minister hnenah pawh inremna kalpui a nih zel dan tur chungchangah Europe rama an thawhpuite leh China leh Russia pawh inbiakna neihpui turin a ti a ni.