Democratic Republic of Congo-ah Ebola hri leng thar leh

Democratic Republic of Congo (DRC) hmar thlang lamah Ebola hri a leng thar leh a, he hri leng vang hian mi 17 an thi niin health ministry chuan a tarlang.

Ministry-in thuchhuah a siamah, Equateur province-ah Ebola hri vei mi 21 hmuhchhuah an nih thu leh, an zinga 17 chuan an thihpui thu a sawi. DR Congo-ah hian kum 1976 aṭang khan Ebola hri a len ṭum kua-na a ni.

World Health Organization (WHO) chuan laboratory-a DR Congo-a damlo panga sample an test aṭangin pahnnih chu Ebola hri vei tih finfiah a nih thu a sawi bawk. He hrileng khuahkhirh a nih theih nan hian WHO chuan Congo sorkar chu a thawhpui nghal thu leh, kum 2017-a hrileng khuahkhirhna tura an hmalakna ang kha an hman leh nghal thu a sawi bawk.

WHO chuan emergency contigency group aṭangin dollar makta-duai khat chu coordination group din nan leh, Congo sorkar leh health agency-te thawhpuitu tur expert 50 chuang tirh nan pekchhuak nghal a nih thu a sawi.

Ebola veite hi ni 2-21 chhungin a langchhuak ṭhin a, khawsik sang, taksa zawi, tha leh ruh na, lu na leh hrawk na te an nei. A nasa deuhah chuan luak leh kawṭha lo, kal leh thin hna thawk lo, internal leh external bleeding-te an nei a ni. He hri veite hi khawih aṭangin inkai chhawn theih a ni. WHO in a chhut danin khawvel ram hrang hrangah Ebola hri hi mi 11,300 chuangin an thihpui tawh a ni.