PM atan Medvedev ruat

Russia President atan lakluh thar, Vladimir Putin chuan prime minister atan Dmitry Medvedev a ruat a, hei hi Thawhlehni khan Parliament-in a pawmpui nghal a ni.

Russia Parliament lower house, State Duma-a Thawhlehni-a vote lakah, prime minister atana Medvedev-a rawtna pawmpuitu hi deputy 374 an awm laiin, a thlawp lo lamah vote 56 a tla a ni. Seat 450 awmna chamber-ah hian rorellai, United Russia party chuan seat 339 a nei mek a, a seat neih zat hi 75.3% a tling.

Medvedev hi kum 52 mi niin, United Russia party chairman ni lai a ni a, kum 2012 khan prime minister atan lakluh a lo ni tawh bawk. Thawhṭanni khan President atana Putin lakluh anih hnuah sorkar hi ṭhiah a ni a, hemi hnu hian Putin chuan Medvedev hi prime minister dinhmun chelh chhunzawm turin a rawt leh a ni.